Ung aultre l'a n'en queres plus
Car dorenavant je conclus
De garder en tout temps mon droit
Chascun se garde en son endroit
Car bien peu me chault du surplus

Je ne vueil pas estre forcluz
D'acorder ou faire reffuz
Mais ce que voulez orendroit
Ung aultre l'a n'en queres plus
Car dorenavant je conclus
De garder en tout temps mon droit

Jamais en ce propos ne fuz
Que mon vouloir fust si confuz
D'entendre atout ce qu'il voudroit
De ce faire on me reprendroit
Congnoissant que seroit abuz

Ung aultre l'a n'en queres plus
Car dorenavant je conclus
De garder en tout temps mon droit
Chascun se garde en son endroit
Car bien peu me chault du surplus