Quant ce viendra au droit destraindre
Comment veray mon œil contraindre
Et mon cuer faindre
A mon douloureux partement
De vous mon loyal pensement
A qui nulle ne puet attaindre

Lermes et pleurs gemir et plaindre
Feront mes yeulx pallir et taindre
Sans rien en faindre
Et lesser tout esbatement
Quant ce viendra au droit destraindre
Comment veray mon œil contraindre
Et mon cuer faindre
A mon douloureux partement

Souspirs engoissuex pour refraindre
Ma joye et ma plaisance estaindre
Ou les reffaindre
Sourdront en moy si largement
Que ne pourray lors bonnement
A grace et a mercy avaindre

Quant ce viendra au droit destraindre
Comment veray mon œil contraindre
Et mon cuer faindre
A mon douloureux partement
De vous mon loyal pensement
A qui nulle ne puet attaindre