[المقدمة: محمد عدوية]
(يا ليلي، يا عيني، يا ليل)
دنيا غاب العدل فيها (مشّيها)، إختلِّت الموازين (آه)
فجأة كل الصح فيها بيتفهم بالعكس
والضعيف بيشوف بعينه (آه)، شماله يبقى يمين
حسبة مش محسوبة صح وبتتولد من اليأس

[المقطع الأول: محمد عدوية]
مهما تندم مش باقيلك باب ندم مردود
النجوم لرجوعك أقرب والطلب مرفوض
هي دي الدنيا وقانونها إللي إنتَ ما فهمتوش
مُجبر إنك تبقى واحد تاني ما إختارتوش

[جسر: محمد عدوية]
مهما تندم مش باقيلك باب ندم مردود
النجوم لرجوعك أقرب والطلب مرفوض
هي دي الدنيا وقانونها إللي إنتَ ما فهمتوش
مُجبر إنك تبقى واحد تاني ما إختارتوش

[المقطع الثاني: دبل زوكش]
شوف كنا فين وبقينا فين
زي ما سعيت أنا لقيت
لازم تعرف، الجنيه بيجيب جنيه
وإن لو في حد راح ما تجيش عليه
زي ما بعوز أعيشها أنا بعيشها
عمري ما سلِّمت ليها والدنيا تِشهَد
دنيا زي مولد، إحنا دراويشها
وأما الدنيا بتناكشني بناكشها
[اللازمة: محمد عدوية]
الشيطان هو إللي سايق، ماسك الطارة
وإللي هيسلِّمله سهل تحركه إشارة
وإللي راهن مش فارقله، أصله باصص تحت رجله
والرهان جمَّع مكاسب بس كانت جمعها خسارة

‫‫[جسر: محمد عدوية ودبل زوكش]
‫‫يا ليلي، يا ليلي، ليلي (تِشهَد)، يا ليل (تِشهَد)
‫‫ليلي، يا ليلي (تِشهَد)، يا ليلي، يا ليل (تِشهَد)، يا عيني (تِشهَد)

[المقطع الثالث: دبل زوكش]
الناس من قلة الفلوس فيك يعيبوا
الناس ما بتفكرش القرش منين تجيبه
حلال أو حرام، المهم يكون في جيبه
لو معيوب تداري عيبه، لو ما فيش الناس تسيبه
بقينا في زمن الناس حابَّة الحرام
بشر بتعبد الجنيه، زمن أصنام
ساعات بحس إن أنا عندي إنفصام
أوقات بكون شبهُّم، بضطر أكون شيطان

[اللازمة: محمد عدوية]
الشيطان هو إللي سايق، ماسك الطارة
وإللي هيسلِّمله سهل تحركه إشارة
وإللي راهن مش فارقله، أصله باصص تحت رجله
والرهان جمَّع مكاسب بس كانت جمعها خسارة