فولکور:
«بوْزآت» سنی سر-طؤیله‌ده باغلارام
آند ایچیرم سنه مخمل چۇل‌لارام
اگر منی بۇ داوادان قورتارسان
قیزیلدان گۆموشدن سنی نال‌لارام

نبی نین بوغلاری ائشمه-ائشمه دی
پاپاغی گۆلله‌دن دئشمه-دئشمه دی
نبی‌نین آتینی بیر آت کئشمه‌دی

قوی سنه دئسینلر آی قاچاق نبی
هجری اؤزوندن آی قوچاق نبی

گۆن چیخیبدی گۆن-اوْرتانین یئرینه
هجر خانیم قالخدی آتین بئلینه
اشرفی میرواری دۆزوب تئلینه

منیم بو گۆنومده گلسین نبی
قازامات دامینی دلسین نبی

قوی سنه دئسینلر آی قاچاق نبی
هجری اؤزوندن آی قوچاق نبی

شهریار:
دۇر! قفس قاپيسين بير آچاق نبی
بۇ سؽنيق قاناتلا بير اوچاق نبی
آی قوچاق نبی آی قوچاق نبی
قازامات ايستی‌دير ياتا بيلميسن
آنالار بئشيگين آتا بيلميسن
اؤز آتا يوردونو آتا بيلميسن
غيرتين قۇربانی آی قوچاق نبی
آی قوچاق نبی آی قوچاق نبی

اون‌بئش ايل کافیرین ظولمونه دؤزدون
او نقشه چکديکجه نقشه‌سين پوزدون
ایندی‌کی اوْبادان ائلدن ال اۆزدون
غم يۆکون چاتميشام دۇر کؤچاق نبی
آی قوچاق نبی آی قوچاق نبی

دورت‌بير-دؤره‌ميزی سالدات‌لار آلدی
قلعه‌لر اۇجالدی قارانلؽق سالدی
زيندانين اؽشيق‌سيز گۆنش‌سيز قالدی
هيمتين اۇجادير، دام آلچاق نبی
آی قوچاق نبی آی قوچاق نبی