[المقطع الأول]
يوم ميلادك، يوم ما للدنيا إنت جيت
أول علاقتي بيك صوتك، ما بيني وبينك حيط
سمعت صوتك إستغربت إتلخبطت إتشديت
قلبي إتنفض ما بين ضلوعي ومن الفرحة بكيت
أول ما شفتك الدنيا لفت بيا
ربي حبني وهبلي من عنده هدية
سرحت فيك ساعات، فيك مني كثير حاجات
يا رب تاخد مني بس الحلو في الصفات
وفي وسط زحمة فرحتي فجأة هجم سكات
مخلوط صور أبيض في إسود من اللي عيشته ومن اللي فات
يمكن عشان الضلمة في طفولتي كانت أكتر من نور
عيل صغير قال بسم الله وقام يعدي في بحور
مش شايف شط أو ميناء لآخر البصر مفيش أمل
كان نفسي في حد يعلمني وينصحني ويبقالي المثل
ربك حماني وإتولاني برحمته، ما فيش جدل
بعد ما كل سكة إتسدت وإسودت والباب قفل
يا رب يا كريم إهديني وقويني و وفقني لسكة تربيته على الشيء السليم
عارف إني مش مثالي بس طمعان في كرمك تخلي حاله أحسن من حالي
وأنا أوعدك يا رب هحاول أبقى أحسن أب
وإديه اللي ما شفته في نهر طفولتي اللي نضب

[المقطع الثاني]
كل يوم بيعدي وأشوفك فيه بتكبر
بتفاجىء إن صفاتي بتظهر فيك أكتر وأكتر
إبتسامتي وضحكتي والمشي وحتى تكشيرتي
حتى نومتك رجل فوق رجل دي نسخة من نومتي
قبل وجودك الدنيا ما كانتش فارقة معايا
قلبي ده كان خلاص قلب حجر دي مش كناية
جلدي تخن من قسوة الدنيا ومر الحكاية
بقيت زعلان على الشخص اللي شايفه في المراية
لحد ما إنت جيت غيرتني وكنت الهداية
فتحت بإيدك كل أبواب الرحمة جوايا
لما بحضنك وأحس دقة قلبي جنب قلبك
مية في المية ما حبتش في الدنيا قبلك
لما بحضر أول مرة ليك في أي حاجة
قلبي بيرفرف وأحس بألف حاجة وحاجة
إحساس غريب، جزء مني إتحول إنسان
بيزعل وبيفرح وبيزرع جوايا الحنان
خايف عليك من الدنيا يا ابني مالهاش أمان
وبدعي ربنا يحميك ويصونك (هو الرحمان)
كتبت رسالة ليك عشان لو قدري وقته حان
ومش مكتوبلي أكون جنبك لآخر الإمتحان
عاوزك تكون صاحب عزيمة فولاذ حديد
مهما الدنيا تحبطك صمم خليك عنيد
خليك واثق في نفسك، عن حلمك إياك تحيد
مهما إسود الليل وطال هيطلع فجر جديد
عاوزك لربك شاكر وجهد الناس تقدر
وإوعى تظلم مهما كنت قادر ربك أقدر
إوعى تفضح عيب إنسان لو ربك ستر
كما تدين تدان، ما تضمنش القدر
لو قلت كلمة حق والناس قامت عليك
كإنهم قالوا لك مبروك تسلم إيديك
عشان الكلب الميت ضربه مش مطلوب
لكن لو كان شجر مثمر بيتحدف بالطوب
لو يوم ذنوبك تقلت إرجع لربك توب
ربك لو حبك حيحبب فيك كل القلوب
[المقطع الثالث]
ساعات بسرح وبسأل نفسي والدماغ تفكر
يا ترى هتبقى فعلاً ضهري لما أكبر
لما العجز يبدأ ينهش فيا ويجور عليا
في عز إحساسي بضعفي هيكون قلبك عليا
لما اللسان يتقل والكلام يصبح بطيء
وأعيد نفس الكلام أكتر من مرة أرجوك تطيق
ياما طلبت مني أعيد حكي الحدوتة كتير
وفي كل مرة كنت أعيد لك قلبي كان بيطير
لما تلاقيني قدمت ومش مواكب عقل جيلك
ما تركنيش لجهلي، علمني من غير ما أجيلك
خليك عينيا نورلي طريقي لمنتهاه
وإفتكر إني من علمك معنى الحياة
لما أبطل أقدر أمشي لوحدي خطوتين
لما أكون أضعف من إني أقدر أشرب من غير معين
لما تموت الذاكرة وبالعافية أعرف إنت مين
وجودك جنبي كفاية لحد ما يجيني اليقين
كلمتين هقلهم عندي أغلى من الياقوت
كنت معاك يوم ولادتك عاوزك جنبي يوم ما أموت